Ginkumpirmar sang Battalion commander sang 79th Infantry Battalion, Philippine Army nga nakilala ang nakaengkwentro sang mga tropa sang gobyerno sa Barangay Tamlang, Escalante City, Negros Occidental sang Hunyo 1.
Sa nasambit nga engkwentro napatay si Private First-Class John Rey Brasil.
Suno kay Lt Col Eric Alfonso, ang isa sa mga naengkwentro sang mga suldado amo si Alejandro Kier Montoya nga kaupod ni Roger Fabilliar alyas Arnel Tapang.
Suno kay Alfonso, ginpatay ni Montoya ang iya sibilyan nga utod nga si alyas Jonhee sa Barangay Gawahon, Victorias City sang April 2, 2025.
Antes pa man si Montoya nagsulod sa New People’s Army, pugante ini kag may mga kaso nga murder, carnapping kag act of lasciviousness.
Sa karun, padayon nga gina-ayam sang mga otoridad si Montoya.
Sa impormasyon man nga nakuha sang Bombo News Team si Montoya ang kaupod ni Francisco Epogon, ang gina-alegar nga pinuno sang notorious Epogon robbery/hold-up group kag sang tatlo ka iban pa nga mga priso sa Negros Occidental District Jail nga nagpalagyo sang Hunyo 29, 2021.
Ang tatlo ka iban pa ang ginkilala nga sanday Daniel Tamon kag ang mag-utod nga sanday Marvin kag Danilo Celeste.
Sang Hunyo 30, si Epogon ang liwat nga nadakpan sa Barangay Amontay, banwa sang Binalbagan, samtang si Daniel Tamon ang nadakpan sa Barangay Blumentritt, banwa sang Murcia.
Sa pareho nga adlaw napatay man si Marvin Celeste.
Samtang sang Hulyo 2 napatay man si Danilo Celeste matapos ang pag-track sang mga kapulisan sang mga escapees sa Barangay San Fernando, Talisay City, Negros Occidental.
