Napasakaan na sang kaso kahapon ang magbayaw nga nagtiro sa duha ka intelligence officer sang City Intelligence Unit sang Bacolod City Police Office sa atubang sang Bureau of Jail Management and Penology office sa Magsaysay Avenue, Brgy Singcang-Airport, Bacolod City sang Miyerkules, alas- 9:00 sang gab-i.
Ang duha ka mga suspek ang ginkilala nga sanday Alyas Tomas ukon Romeo Araiz, 28 anyos, single, residente sang Prk Jalandon, Brgy 2, Bacolod City kag alays Toto ukon Bernard Traje, 29 anyos, kasado, residente sang Prk Saging, Brgy Igmayaan, Don Salvador Benedicto.
Sa interview sang Bombo Radyo Bacolod kay Police Major Lyndon Manilla, station commander sang Bacolod City Police Station 8, ang duha ang napasakaan sang kaso paagi sa inquest proceedings.
Si Araiz ang napasakaan sang kaso nga attempted homicide in relation to RA 10591 kun sa dii siya ang nagaangkas sa motorsiklo kag nagtiro sa police nga intelligence officer sang Bacolod City Police Office samtang nakuha man diri ang cal. 45 pistol nga loaded sang bala, magazine nga may lima ka bala.
Samtang si Traje naman ang nagapangatubang sang kaso nga paglapas sa section 11 (possession) ukon RA 9165 ukon Comprehensive Dangerous Drugs Act of 2002 matapos makuhaan sang illegal nga druga.
Samtang suno kay Manilla, may yara sang duha pa nga nagpadulong sa police station 8 nga positibo nga nagtumod sa duha nga responsable sa paghold-up sang mga ini subong nga tuig.
Suno sa station commander, ang police station na nga sakop ang natabuan sang reklamo nga pagpanghold-up ang magapasaka sang kaso batok sa duha.
