Arestado ang anay priso matapos makuhaan sang masobra P2.5 million nga balor sang ginapatihan shabu sa ginpatigayon nga buybust operation sang Bacolod City Police Office, City Drug Enforcement Unit sa Purok Malipayon, Brgy 12, Bacolod City, kahapon, Hunyo 5.
Ginkilala ang subject person nga si Albert Alulod alyas ‘Pol’, 42-anyos, ginakabig nga High Value Individual, lalaki, wala sang trabaho, wala sang asawa kag residente sang Purok Gonzaga Brgy. Taculing sa nasambit nga ciudad.
Sa interview sang Bombo Radyo Bacolod kay Police Lt Col. Albert Sy, Chief, Bacolod City Drug Enforcement Unit kag City Intelligence Unit, ginapreparar na sang mga kapulisan ang mga dokyumento agud nga mapasakaan sang kaso ang naaresto nga subject person.
Suno kay Sy, si Alulod ang nakaagi na priso sa paglapas sa RA 9165 kag ginatsekyar pa ang iban sini nga involvement.
Suno diri, duha man ka semana nila nga ginpaidalom sa monitoring ang subject person antes nga ginpatigayunan sang buybust operation.
Ang iligal nga druga nga nakumpiskar gikan sa suspetsado ang ang ginabanta nagabug-at sa 380 grams nga may standard drug price nga P2,584,000.
