Padayon ang imbestigasyon sang Bago City Police Station sa pagluthang patay sa 41- anyos nga babayi sa atubang sang Negros Occidental District Jail sa Purok Province, Barangay Tabunan, Bago City, Negros Occidental, alas- 4:08 kahapon sang hapon.
Ang biktima ginkilala nga si Ma. Lowela Foster, kasado kag residente sang Barangay 2, Manapla, Negros Occidental.
Suno kay PLt Col James Latayon Jr, hepe sang Bago City Police Station, si Foster nakapamana sang foreign national apang nagbulagay sila kag sa karun ang live in partner sini amo si alyas Sunga.
Suno diri, sang tuig 2019 nadakpan si Sunga sa kaso nga paglapas sa RA 9165 ukon Comprehensive Dangerous Drugs Act of 2002 kag napreso apang nakagwa sang 2021 apang liwat na naman ini nga nadakpan sa kaangay nga kaso sang tuig 2024.
Suno kay Latayon, indi pa mahambal kun ano ang motibo apang wala ginadula ang posibilidad nga may angot ini sa illegal nga druga.
Samtang, nagapasalamat naman ini sa Negros Occidental District Jail matapos nila mahold ang driver sang tricycle nga sakyan kun tani ni Foster antes ini ginluthang bangod siya nakawitness mismo sa natabo.
