Gin-aresto sang mga otoridad ang isa ka 37-anyos nga babayi matapos magpakuno-kuno bilang isa ka 12-anyos nga bata agud mapapati ang isa ka pamilya nga ampunon ini, sa Santa Catarina, Brazil.
Ang suspek ang ginkilala nga si Amanda Maria Souza de Oliveira nga nagpakilala nga biktima sang pang-abuso kag naghingyo sang bulig sa isa ka simbahan sa ciudad sang Joinville.
Sa ulihi, ginbuligan si Amanda sang isa ka pamilya kag ginkabig ini nga pamilya kag matuod-tuod nga kaliwat nila.
Agud ma-into ang nasambit nga pamilya, nagahambal si Amanda nga kaangay sang isa ka bata, nagagamit man ini sang pacifier kag gainom sang gatas sa bidbiron, kasubong man sang pagpakuno-kuno nga nahadlok sa dulom kun gab-i.
Sa ulihi, natukiban sang mga otoridad nga may mga anay biktima na si Amanda sa kapareho nga scheme sa nagkalain-lain nga lugar sa Brazil.
Sa karon, nagapangatubang sang kaso nga fraud kag identity theft ang 37-anyos nga babayi samtang ginahulat pa ang psychiatric evaluation nga ginpangabay sang iya nga abogado.
