Ginpanawagan sang National Irrigation Administration- Negros Occidental Irrigation Management Office nga untatan ang paghaboy sang basura sa kanal sang irigasyon sa ciudad sang Bago.
Ginpadulongan sang Bombo News Team ang irrigation canal sa bahin sang barangay Taloc kag nakit-an nga madamo sang mga basura ang naga utaw-utaw sa kanal.
May yara sang mga plastic, plastic bottle, mga panapton, sako nga may unod nga basura kag iban pa kun sa diin iban nagsupot na sa tamburong.
Ini ginreklamo paagi sa Ipa- Bombo Ta segment sang Bombo Radyo Bacolod bangod kun mag-ilig ang tubig, ang mga basura nagakadto sa talamnan.
Sa interview sang Bombo Radyo kay Josefino Aguero, Sr. Water Resources and Facilities Technician sa Negros Occidental Irrigation Management Office, may yara sang schedule para sa irrigators association sa pagpatigayon sang clearing sa kanal kag ini nalakip sa ila kontrata.
Suno diri, masobra 10km halin sa barangay Dulao ang kalabaon sang kanal kag nagapati ini nga kalabanan sa mga basura halin sa ibabaw nga naga-ilig lamang papanaog sa barangay Taloc.
Nagapati man ini nga kalabanan sa mga nagahaboy sang basura nagahaboy kun gab-i kun san-o nga wala sang may makakita sa ila.
Suno kay Aguero, nakit-an ang mga basura bangod wala pa naga-ilig ang tubig sa irigasyon samtang yara pa sa sur nga bahin ang schedule sang patubig.
Pahayag sini, nakameeting na ini sa asosasyon nga magbutang sang trash trap para matingob ang basura apang padayon ini nga nagapanawagan nga likawan ang paghaboy sang basura sa kanal sang irigasyon.
