May yara na sang bag-o nga general manager ang Bacolod City Water District.
Ini ang ginpahayag ni Bacolod City Lone District Representative Alfredo “Albee” Benitez.
Suno Benitez, nagkadto sa opisina ang BACIWA Board kag ginpresentar si Atty. Valerie Anne Holero, nga anay regional vice president sang Philhealth sa Western Visayas bilang bag-o nila nga General Manager.
Suno sa kongresista, magameeting ang BACIWA para sa modernization nga ginaduso sang bag-o nga tag-iya sang Prime Water.
Suno diri, ang naestoryahan kaupod ang BACIWA board kaupod ang bag-o nga tag-iya sang nasambit nga water concessionaire ang magapresentar sang bag-o nga modernization program sang water system sa ciudad sang Bacolod nga magalakip sa kun ano kalaba ang gin-ilis nga tubo, diin ang gin-islan, ano ang improvements kasubong man ang equipments nga kinahanglanon agud nga mahatag ang 24/7 high pressure quality water.
Isa mga nadiskusyunan nga ang tanan nga mga kontador sa mga pamalay ang butangan sang digital loggers nga makatransmit sang data agud nga mahibaluan kun may tubig ukon wala.
Bangud sini, mas accurate ang pagtumod kun may yara sang nagatubod nga tubig 24/7 sa mga pamalay ukon wala.
