US President Donald Trump, ginbatikos sang mga Japanese bangod sa paggamit sang anime figures sa iya mga social media post

Ginbatikos kag ginpamatukan sang publiko sa Japan si U.S. President Donald Trump matapos sini magpost sa social media gamit ang mga kilala nga anime kag mangga characters kaangay nanday Naruto, Pikachu, kag Yu-Gi-Oh.

Kapin 20,000 ka indibidwal ang nagpirma sa isa ka online petition nga nagapanawagan sa White House nga respetuhon ang mga Japanese creators kag indi paggamiton ang ila mga obra para sa pagpamulitika.

Suno sa mga kritiko, wala nagasanto ang ginatuohan kag mga hulag ni Trump sa kinaiya kag mensahe nga ginapalab-ot sang mga nasambit nga karakter.

Samtang, ginkondenar man sang Pokemon Company International ang paggamit sang ila imahe kag ginpaathag nga wala sila sang pagpahanugot ukon kaangtanan sa amo nga post.