Naghatag sang mensahe ang anay Team Captain sang Girls Volleyball Team sang Bacolod Tay Tung High School nga si Brianna Nikola Ang sa pagdumdum sang ika-128 ka tuig nga Independence Day subong nga adlaw sa Bacolod City Government Center.
Suno kay Brianna, ang selebresyon subong nga adlaw ang pagdumdum sang sakripisyo kag ka-isog sang mga baganihan agud ma-angkon ang kahilwayan.
Suno diri, bilang atleta natun-an sini nga ang matuod nga kahulugan sang kahilwayan ang indi paagi sa pagpakibato gamit ang armas kundi makita man sa pagtinguha, paghili-usa kag indi pag-surrender sa bisan ano nga pagtilaw.
Ginpakigbahin sini nga bilang Kapitan sa volleyball team kag pagpasakop sa nagkalain-lain nga liga kag Palarong Pambansa, na-eksperyensyahan sini nga ang kadalag-an ang indi makuha nga naga-isahanon lamang.
Kaangay sa Kasaysayan, ang kadalag-an ang resulta sang pag-ensayo, disisplina, kag pagsalig sa isa kag isa kag ang malig-on nga panindugan nga indi mag-surrender bisan ano ka budlay.
Pahayag sini nga sa sulod sang court, ang tagsa ka puntos ang ginapangabudlayan, kag sa pagporma sang pungsod, ang tagsa ka tikang padulong pagsanyog ang nagakinahanglan man sang pagbinuligay.
