Naga-edad sang 12 tubtob 18 ang mga narescue nga babayi nga biktima sang online sexual abuse kag exploitation sa ciudad sang Bacolod.
Sa interview sang Bombo Radyo kay Police Captain Wilma Silva, chief sang Regional Women and Children Protection Desk sang Police Regional Office – Negros Island Region (PRO-NIR), nakig-angot sa ila ang Women and Children Protection Center (WCPC) central office para magpa-assist sa pagrescue sa mga biktima.
Suno kay Silva, ginapa-uba ang mga biktima para kuhaan sang litrato kag ipasa ini sa mga customers sa online platform.
Kun may mapilian na ang mga customers, sunod nga himoon amo ang transaksyon sa bayad kag kun napasa na ang kwarta amo na nga ipasa ang mga pictures kag videos.
Iban sa mga customers nagarequest pa kun ano ang luyag nila nga ipahimo sa mga biktima.
Pahayag sini, iban sa mga kabataan wala na sang ginikanan samtang iban naman nga ginikananan nakahibalo sang nagakatabo apang ginatolerpar lamang.
Natigayon naman nga madakpan ang 51- anyos nga babayi nga amo ang suspek kag ini kaingod balay lamang sang mga biktima.
Nagapati si Silva nga madamo pa sang iban man nga nabiktima ang suspek.
Sa karun yara na sa Department of Social-Services & Development (DSSD) ang mga biktima samtang ang suspek naman mahimo pasakaan sang kaso nga Republic Act No. 11930 ukon Anti-Online Sexual Abuse or Exploitation of Children (OSAEC) and Anti-Child Sexual Abuse or Exploitation Materials (CSAEM) Act apang mahimo pa madugangan ang kaso nga paga-atubangon sini kun makakuha na sang statement gikan sa mga biktima.
Samtang, mahimo man mapasakaan sang kaso ang mga ginikanan sang mga biktima nga nagatolerar sa pagpang-abuso sa ila bata.
