Napasakaan na sang kaso nga murder ang 24- anyos nga college student nga nagpa-inom sang muriatic acid sa 36- anyos nga manunudlo nga miyembro sang LGBTQ+ community sa Barangay Alijis, Bacolod City.
Sa interview sang Bombo Radyo Bacolod kay Jay-R Reyes, station commander sang Bacolod Police Station 7, suno sa alegasyon sang suspek samtang naga-inom inom, ginbutangan sang manunudlo sang muriatic acid ang ilimnon kag nagbalos lamang ini bangod sa kaakig.
Suno diri, may pilas ang baba sang biktima nga kaangay nasunog.
Wala na nakagwa pa sa balay ang suspek bangod nakalock ang gate kag nagtuyo nga gub-on ang kisame apang naka-abot na ang pulis kag ini nakit-an nga nagapanago sa idalom sang lamesa. Samtang nakakuha sang impormasyon ang Bacolod Police Station 7 nga nagakinahanglan sang kwarta ang 24- anyos nga lalaki nga nagpatay sa 36- anyos nga manunudlo nga miyembro sang LGBTQ+ community sa Barangay Alijis, Bacolod City.
Sa interview sang Bombo Radyo Bacolod kay Police Captain Jay-R Reyes station commander sang Bacolod Police Station 7, madugay na nga magkilalahay ang duha apang indi estudyante sang manunudlo ang suspek nga college student.
May yara sang alegasyon nga may himoon kun tani nga sensitibo nga buluhaton ang duha kun sa diin nakahigot sa bangko ang manunudlo.
Suno kay Reyes, gina-alegar sang suspek nga una siya ginpa-inom sang manunudlo sang muriatic acid nga nasulod sa water bottle kag nagbalos lamang ini.
Nabatian sang mga tawo sa lugar nga may nagasinggit nga nagapangayo sang bulig kag gilayon nga gintawagan ang kapulisan.
Naabtan na lamang nga nagahigda ang biktima sa salog kag pagtsekyar sang rescuers, wala na ini sang kabuhi.
Suno pa kay Reyes, wala nila nakita nga nahigot ang biktima apang may mga senyales nga ginhigot gid man ang iya mga kamot.
