Ginapanawagan sang alkalde sang ciudad sang Cadiz sa mga principal kag school heads nga mangin mabinantayon sa mga organisasyon nga ginasudlan sang mga estudyante.
Sa interview sang Bombo Radyo Bacolod kay Cadiz City Mayor Salvador “Bading” Escalante, ginpahayag sini nga indi lamang recruitment sang New People’s Army (NPA) ang dapat bantayan kundi pati man ang iban nga grupo nga mahimo makaimpluwensya sang malain sa kabataan, kaangay sang fraternities kag mga may kaangtanan sa iligal nga droga.
Pahanumdom naman sang alkalde sa mga kabataan nga magpaminsar sang maayo antes magsulod sa bisan ano nga organisasyon, bangud mahimo ini makaapekto sa ila bwas-damlag.
Suno kay Escalante, padayon nga ginamonitor sang mga eskwelahan ang posible nga mga iligal nga aktibidad sa sulod sang mga buluthuan.
