Pormal na nga gin-elehir bilang bag-o nga Senate President si Senator Sherwin Gatchalian sa ginpatigayon nga special session kahapon matapos ang duha ka semana nga tensyon sa liderato batok kay Senator Alan Peter Cayetano.
Nakuha ni Gatchalian ang “unanimous” nga boto naggikan sa 13 ka mga senador nga nagtambong kalakip si Senator Francis “Chiz” Escudero kag Senator Joel Villanueva nga lunsay gikan sa bahin sang Cayetano bloc apang ‘no show’ naman ang paksyon ni Cayetano sa special session.
Antes ang eleksyon sa Senado, nag-concede na si Cayetano sa Senate Presidency paagi sa iya social media account.
Magluwas kay Gatchalian, gin-elehir man bilang bag-o nga Senate President Pro Tempore si Senator Vicente “Tito” Sotto III samtang si Sen. Juan Miguel “Migz” Zubiri naman ang gin-appoint bilang bag-o nga Senate Majority Leader kag chairperson sang Committee on Rules.
Pila naman ka Senador sang minorya ang nagpabutyag sang ila pagsuporta kag ginpanginbulahan ang bag-o nga majority bloc.
Opisyal na nga nagreorganisa sang bag-o nga mga lider kag myembro sang mga komitiba sa Senado kahapon matapos ang ginpatigayon nga special session.
Gin-elehir bilang bag-o nga Senate President si Sen. Sherwin Gatchalian, Sen. Vicento “Tito” Sotto III bilang Senate President Pro Tempore, samtang nagpabilin naman nga Majority Leader si Sen. Juan Miguel “Migz” Zubiri.
Yari ang listahan sang bag-o nga ginpang-elehir nga chairperson sang mga komitiba:
• Sen. Bam Aquino ang komitiba sang Basic Education kag Trade, Commerce and Entrepreneurship
• Sen. JV Ejercito naman ang magapamuno sa Finance kag Local Goverment kag gin-appoint man ini bilang Senior Deputy Majority Leader
• Sen. Risa Hontiveros naman ang chairperson sang Health and Demography, kag Women, Children, Family Relations and Gender Equality
• Sen. Ping Lacson sa Ways and Means
• Sen. Lito Lapid sa Games and Amusement
• Sen. Francis Pangilinan sa Constitutional Amendments, Agriculture, Food and Agrarian Reform, kag Justice and Human Rights
• Sen. Tito Sotto III sa National Defense kag Ethics and Privileges
• Sen. Erwin Tulfo bilang chairperson sang Blue Ribbon Committee, Social Justice, Welfare and Rural Development, kag Energy
• Sen. Raffy Tulfo sa Public Services kag Migrant Workers
• Sen. Joel Villanueva sa Labor and Employment, Higher, Technical and Vocational Education kag gin-appoint man bilang Deputy Majority Leader
• Sen. Migz Zubiri sa Foreign Relations kag Rules
Gin-appoint man bilang bag-o nga mga myembro sang Commission on Appointment sanday Sen. Lacson, Zubiri, Villanueva, Hontiveros, Sotto, Raffy Tulfo, kag Ejercito.
Samtang ginpasulod naman bilang bag-o nga mga myembro sang Senate Electoral Tribunal sanday Sen. Aquino, Pangilinan, Lapid, kag Escudero.
