Ginapasalamatan na lamang sang Punong Barangay sa Brgy 3, Bacolod City nga wala naglapta ang kalayo, apang pila sa mga pumuluyo ang nagapanawagan na sa tag-iya sang balay nga maghalin sa lugar matapos nga makaduha na masunogan sa sulod lamang sang isa ka semana.
Sa interview sang Bombo Radyo Bacolod kay Punong Barangay Leonidas Asan, ang balay nga nasunog ang ginapanag-iyahan ni Alyas Alfredo, 62 anyos sa Prk Cheriza South, Brgy 3, ang amay sang ila nga Sangguniang Kabataan chairman.
Luwas sa sunog pasado alas-8:00 kaina sang aga, una na nga nasunog ang bahin sang balay sang Hunyo 16 alas-4:30 sang kaagahon.
Ginapasalamatan sang Punong Barangay nga may pader sa palibot sang balay, nga nagserbe nga firewall agud indi makatabok ang kalayo.
Nahibaluan nga dikit-dikit ang kalabanan sa mga balay sa area.
Ginapasalamatan man sini ang pagbayanihan sang mga pumuluyo agud gilayon nga mapalong ang kalayo.
Samtang emosyonal naman ang kaingod sang nasunog nga balay bangod sa tuman sini nga kahadlok nga malab-ot sang kalayo ang ila balay.
Sa interview sang Bombo Radyo Bacolod kay Justine Simpas, tuman na ang halit nga natuga sa ila sang asod-asod nga sunog bangod sa napabay-an nga tinig-ang sang kaingod
Suno diri, maayo gid ang pagtratar sa ila ni Alfredo, apang kun wala ang pader nga nagapatunga sa ila mga balay, nagapati ini nga kalakip sila sa madulaan sang puluy-an.
Nagahibi man ini sang magpahayag nga ang mga pumuluyo na ang bahala sa paghusgar kay Alfredo.
