Padayon ang pagduging sang Red-Striped Soft Scale Insect (RSSI) sa mga pananom sa probinsya sang Negros Occidental kag Negros Oriental.
Sa interview sang Bombo Radyo kay Ma. Lourdes Almodiente, SRA deputy administrator for research and development, as of June 11, yara na sa 4,600 hectares ang ila navalidate nga may reported nga halit sang RSSI kag halos kada semana nagasaka ang report sang apektado nga pananom.
Sa Negros Occidental, ang ciudad sang Bago ang nagapanguna nga apektado sang RSSI nga ginasundan sang banwa sang Mabinay sa Negros Oriental.
Suno diri, ginahigop sang RSSI ang duga sang tubo tubtob nga mangluya ini kag malaya nga magaresulta sa kamatayon sang tanom.
Suno kay Almodiente, kun kaisa ang RSSI nagapilit sa bayo sang tawo ukon equipment sa pananom amo nga madasig ang paglapta sini.
Samtang, naga-upod man ang ini nga peste sa mga truck nga nagabyahe sang tubo amo nga kalabanan nga nagakahalitan amo ang mga pananom sa kilid sang dalan.
Dugang pa ni Almodiente, mas madasig ang pagduging sang RSSI sa tion sang tig-ilinit samtang nagahina naman ang population sang RSSI sa tion sang pag-ulan.
