Nalumos ang 65-anyos nga babayi samtang nagapanulo sa baybayon sang Brgy Cadiz Viejo, Cadiz City, sang Miyerkules, alas-11:40 sang gab-i.
Ang biktima ginkilala nga si Araceli Embile, single, wala sang trabaho kag residente sang hacienda Lelia 2, sa nasambit nga barangay.
Sa interview sang Bombo Radyo kay Plt Daleen Grace Loreno, Deputy Chief of Police sang Cadiz Component City Police Station (CCPS), nagapanulo si Embile kaupod ang iya tatlo ka hinablo apang hinali lamang nga nagbrownout amo nga wala na sila sang magamit nga basehan kun malapit lamang sila sa coastal area.
Bangod sang kadulom, nagtalang si Embile kun sa diin ang ginsunod sini nga suga amo ang padulong sa Lakawon Island tubtob nga nakalab-ot ini sa madalom nga bahin sang baybay.
Gilayon nga nagpatigayon sang search and retrieval operation kaupod ang mga rescuers kag alas-3:00 sang kaagahon kahapon nasapwan ang biktima nga wala na sang kabuhi.
