Dakop ang 19 anyos nga lalaki matapos nga ginbuno kag gingulgulan sini sa liog ang iya kaugalingon nga tiyo sa Barangay Minoyan, banwa sang Murcia, Negros Occidental.
Sa interview sang Bombo Radyo Bacolod kay Police Lt William Abellar, Deputy Chief of Police sang Murcia Municipal Police Station, ginbuno kag gingulgulan sang suspek ang kaugalingon nga tiyo bangud sa isa lamang ka puno sang kahoy nga gintapas agud nga ulingon.
Suno kay Abellar, una na nga ginhambalan sang suspek ang biktima nga indi pagtapson ang kahoy bangud ini ang gintanum sang iya amay.
Suno diri, nag okay man ang duha sang una nga pag-estoryahanay apang gindayon sang iya tiyo ang pagtapas, gani sang nagpauli sang suspect ginbantayan sini, ginbuno kag gingulgulan sa Iiog ang iya tiyo.
Matapos ang krimen nagpalagyo ang suspek apang nadakpan man gilayon sa ginpatigayon nga hot pursuit operation.
Wala naman sang plano ang pamilya sang biktima nga magpasaka sang kaso batok sa suspek bangud may yara na sila sang pag-estoryahanay.
