Emosyonal nga ginpanginwala ni Lotlot de Leon ang ginaalegar sala nga pahayag sang utod sini nga si Ian de Leon angot sa nabilin nga propidad sang nagtaliwan nga superstar nga si Nora Aunor.
Nauna na nga ginpahayag ni Ian sa isa ka interview, nga may plano ini nga magtukod sang One Person Corporation (OPC) nga magauyat sang legacy kag mga proyekto ni Nora Aunor, kag ginpaathag nga siya lamang ang “sole legal heir” nga may katungdanan sa pagdumala sang estate.
Apang, sa story conference sang pelikula nga “40 Days”, ginklaro ni Lotlot nga wala sila sang partisipasyon sa nasambit nga plano kag wala sila sang interes sa anuman nga ginpanubli sang ila iloy.
Suno pa diri, naghalin sa ila nga mag-ululutod ang ideya nga maghimo sang korporasyon para sa legacy sang ila nga iloy, kag indi lamang para sa personal nga interes.
Ginklaro man ni Lotlot nga wala sila sang ginaangkon nga mga propiedad naggikan kay Nora Aunor kag malipayon na ini nga nangin anak siya sang Superstar.
