Ginsuguran na ang pagpanakop kag pagsaway sang mga nagatulog, nagapanigarilyo kag naga-uba sa Bacolod City Public Plaza.
Ini kasunod sang gina-alegar holdup incident nga nagluntad sa lugar.
Sa interview sang Bombo Radyo Bacolod kay Bacolod City Administrator Atty Mark Steven Mayo, nagpadala na ang iya opisina sang memorandum order gikan kay Bacolod City Mayor Greg Gasataya sa City Legal Office, Public Order and Safety Office, Government Services Office, kag Department of Social Services Office.
Kun sa diin ginamando ang pagpasanyog sang tikang agud maclearing ang Bacolod City Public Plaza, gikan sa mga nagatukod sang hayob-hayob, nagatulog, kasubong man sa mga naga-uba, tiniil kag nagapanigarilyo sa plaza nga kaangay nga sila ang yara lamang sa ila nga balay.
Iga-copy furnish man nila ang memorandum sa Bacolod Police Station 1, nga una naman nila nga nasugilanon sa pagbulig sa pagbantay kag paghatag seguridad sa lugar.
May-ara na sang nakaplastar nga security guards sa plaza, nga ginhatagan na nila sang pahanugot nga makapamangkot kun may makita nga makaduluda nga persona kag transaksyon, ukon makapanaway sa nagahimo sang bayolasyon.
Ini agud malikawan ang posibilidad sang pagluntad sang kinagamo ukon mga kriminalidad kaangay sang pagpangholdup.
Suno kay Mayo, ginsuguran na nila sang Miyerkules ang clearing sa area agud gamay nalang ang hilimuson sa tion nga matapos na ang rennovation sa Bacolod City Public Plaza.
Ginalantaw nga matapos ang proyekto sa katapusan sang Setyembre ukon sa una nga semana sang Oktubre bangod ang lugar ang gamiton nga venue sa Bacolod Masskara Festival 2026.
