Nagdagsa ang mga tawo sa Philippine Statistics Authority- Negros Occidental para magparehistro sa National ID bilang requirements sa Pantawid Pamilyang Pilipino Program (4Ps).
Sa interview sang Bombo Radyo Bacolod kay Diesah Biaoco, officer in charge sang PSA- Negros Occidental, on going ang registration sa National ID apang nagdagsa gid ang mga tawo subong nga adlaw bangod may yara sang deadline ang 4Ps.
Suno diri, gindala sang mga ginikanan ang ila mga kabataan bangod ini sa requirements para sa proyekto sang DSWD para sa 4Ps beneficiaries.
Suno kay Biaoco, nagdangat sa 600 tubtob 800 ang nagpadulong apang 100 tubtob 150 lamang ang ila macater adlaw-adlaw.
Iban sa mga luyag magparehistro nagdesisyon na lamang nga didto magtulog agud makahingagaw sa pagkasunod nga adlaw.
Pahayag ni Biaoco, sa may luyag magapadulong sa PSA, iya ginapahibalo nga indi na sila magbaton subong nga semana bangod puno na ang ila slots apang mahimo nila mascreening ang documents sang registrant kag kun may available pa nga slot, pwede pa sila macater.
