Gilayon nga naghimo sang tikang ang principal IV sang Negros Occidental High School kasunod sa natabo nga shooting incident sa Tacloban City kahapon.
Sa interview sang Bombo Radyo Bacolod kay Dr Cheryl Tondo, sang tinalidkan nga semana yara ini sa Manila sang nakita sini ang balita nga may nagluntad nga stabbing incident sa buluthuan sa Cavite.
Madumduman nga sang Hunyo 16, pito ka Garde 5 pupils sang Bethel Academy of General Trias sa Cavite ang pilason matapos gin-atake sang Grade 8 student gamit ang kitchen knife kag sang Hunyo 19, sa Cavite National High School may senior high school student nga pila ka bes ginbuno ang 18- anyos nga estudyante.
Suno kay Tondo, gilayon ini nga nagcontact sa NOHS para gamiton ang available nga metal detector.
Ini ginbutang sa entrance sang buluthuan sa Araneta st kag entrance sa Hernaez st.
Wala sang may ginahimo nga body search apang kun may madetect ang metal detector, may yara sila sang area kun diin pwede madala ang estudyante kag didto ipabukas sa iya ang iya bag.
Pahayag ni Tondo, naka-intindi ini sa kabalaka sang mga ginikanan amo nga nagpasalig ini nga nakahibalo sila kun ano ka importante ang safety sang mga kabataan sa sulod sang buluthuan nga amo na ang ila ikaduha nga panimalay.
Nagpanugyan man ini sa mga ginikanan nga tsekyaron ang mga kabataan antes maghalin sa balay kag magpauli samtang sila naman nga mga manunudlo indi mag-untat sa paghanumdom sa mga kabataan kun ano ang insakto kag indi nga ginahimo sa sulod sang buluthuan.
