As of June 21, 2026 nagdangat na sa masobra sa 30 percent sang katubuhan sa Negros Occidental kag Negros Oriental ang apektado sang Red Striped Soft-Scale Insects (RSSI) infestation.
Sa Central kag Northern Negros Occidental nagdangat sa 30,341.42 hectares nga katubuhan ang apektado; 1,662 ka mga mangunguma, 15 ka Barangays sa sulod sang 14 ka Local Government Units ang naapektuhan.
Sa Southern Negros, nagdangat sa 30, 860.40 hectares sang katubuhan, 2,856 farmers, 119 Barangays sa sulod sang 18 ka LGU ang apektado.
Sa Negros Oriental nagdangat sa 15,365.53 hectares sang katubuhan, 532 farmers, 56 Barangays kag 24 Local Government Units ang naapektuhan sang Red Striped Soft-Scale Insects (RSSI) infestation.
Sa bug-os nga Negros Island Region nagdangat sa 76,607 hectares sang katubuhan ang apektado ukon 32.12 percent sang total areas nga 239,215.62 hectares sang katubuhan samtang 5258 ka mga mangunguma ang apektado nga nagikan sa 333 ka Barangay sa sulod sang 54 Local Government Units.
Sa kaangot nga balita…. Ginpahayag ni Sugar Regulatory Administrator Pablo Luis Ascona, kun magpadayon ang infestation sang RSSI dako ang epekto sini sa sugar production.
Suno kay Ascona, nagdangat na sa masobra 30 percent sang katubuan sa Negros ang naapektuhan na sang RSSI infestation kag tuman na ini ka dako.
Suno diri, ang pagkadula sang 30 percent sang sugar production sa Negros Island, ang katumbas sang 390,000 metric tons sang kalamay ukon 19 tubtob 20 percent sang national production.
Ini ang magatuga sang P17.5 billion nga kapierdihan.
Sa karun ginahulat pa kun gamiton nalang ang nagligad nga resolusyon sa pagdeklarar sang state of calamity bangud sa sitwastyon sang mga katubuhan sa probinsya ukon kinahanglan nga magpagwa sang bag-o.
Suno diri, ang SRA ang nakagasto na sang P177 million nagikan sa corporate fund sang ahensya kag P228 Million gikan sa SIDA.
Kalabanan sa pondo ang gingamit sa pesticides kag insecticides para sa pagtapna sa RSSI.
Suno kay Ascona, pahulamon sang DA ang SRA sang laboratory agud nga makahimo sang madamo nga fungus nga makabato sa nasambit nga insecto.// Ini bangud kulang ang area sang SRA nga nagahimo sang fungus.
Samtang ginpahayag man sini nga sa bulig sang probinsya, Local Government Units kag ang gintukod nga RSSI Provincial Task Force dakon ginalantaw nga matapna na ang padayon nga pagpanghalit sang nasambit nga insekto sa mga katubuhan sa probinsya.
