May ginpatuman na nga preventive measures ang mga Local Government Units sa probinsya sang Negros Occidental bangod sa kumpirmado nga kaso sang African Swine Fever sa isa ka LGU.
Kumpirmado nga may yara sang kaso sang ASF sa banwa sang San Enrique kag kasunod sini iban nga mga LGUs naghimo na sang preventive measures agud malikawan ang paglapta sang nasambit nga balatian.
Suno kay La Castellana Municipal Mayor Aniejo Nicor, wala sang kaso sang ASF sa banwa apang naghimo na ini sang tikang nga indi makasulod ang virus.
Suno diri, nagpagwa ini sang Executive order nga paghamtang sang checkpoint sa boundary sang Isabela, La Carlota kag Canlaon para indi makasulod ang mga baboy, karne sang baboy, kag iban nga pork products sa banwa.
Samtang may ginpagwa man nga Executive order si Isabela Municipal Mayor Miguel Angelo Yulo nga pag-ban sa pagtrasnfer sang buhi nga baboy, karne sang baboy, kag iban nga pork products sa banwa.
Wala man ginapahanugotan ang pagbaligya sang imported nga pork products kun wala sang permit.
Samtang, nagpagwa man sang EO si Binalbagan Municipal Mayor Emmanuel Aranda nga pagpatuman sang banning sa pagsulod sang baboy sa banwa.
May ginhamtang man nga checkpoint inspection ang LGU sang San Carlos City kag Moises Padilla para matsrikto ang pagpasulod sang baboy sa lugar.
