Patay ang 48-anyos nga lalaki matapos ginkastigo kag ginlamposan sang bato sa ulo sang tatlo ka suspek sa sitio Balingasag, barangay Masulog sa banwa sang La Castellana, pasado alas-4:00 sang hapon sang Miyerkules.
Ang biktima ang ginkilala nga si alias “Sonny,” 48-anyos samtang ang mga suspek naman amo sanday alias “Reymon,” 30-anyos, alias “Romnick,” 20-anyos, kag alias “Jonafel,” 18-anyos, nga lunsay mga residente sang nasambit nga lugar.
Sa interview sang Bombo Radyo Bacolod kay Police Captain Jose Michael Muniez, Deputy Chief Police sang La Castellana Municipal Police Station, nasapwan na lamang nga wala na sang kabuhi sa higad sang sapa si Sonny.
Suno diri, santo sa imbestigasyon masami nga may kaupod si Sonny nga mga lalaki sa pag-inom inom kag sila man ang masami nga nagadul-ong sa biktima sa pagpauli.
Suno kay Muniez, nagsungka ang tatlo ka suspek apang wala sila nanugid kun ano ang rason kun ngaa ginhimo nila ang krimen.
Ang tatlo ka suspek ang magapangatubang sang kaso nga murder.
