Pilason kag nagkinahanglan sang atensyon medikal ang isa ka Grade 11 student nga transferee matapos ginpulihan kastigo sang mag-utod nga mga estudyante sa gwa sang Father Gratian Murray Integrated School sa Brgy. Granada, Bacolod City sang Huwebes.
Sa interview sang Bombo Radyo Bacolod kay Engr. Llenamar Melchor, principal sang buluthuan, nag-umpisa ang insidente bangud ginpahayag nga nagtulok ang transferee sa nobya sang isa ka Grade 12 student.
Ginpaminsar sang Grade 12 nga ginbastos ang iya kahagugma, nga nagresulta sa pagbinaisanay.
Matapos ang komprontasyon, gilayon nga ginpatawag sang administrasyon ang mga estudyante kag ginpaatubang sa guidance counselor.
Nagpirma man sila sang kasugtanan kag ginapatihan nga natapos na sadto ang tensyon.
Apang sang nagpauli na ang Grade 11 student, ginhulat ini sang Grade 12 kag sang iya Grade 10 nga utod sa gwa sang eskwelahan.
Suno sa inisyal nga impormasyon, nag-upod ang Grade 10 sa pagpangkastigo bangud sa pagpati nga ginbastos sang biktima ang iya magulang.
Matapos ang insidente, nagreklamo ang biktima nga may ginabatyag ini sang sakit sa ulo kag sa nagkalain-lain nga bahin sang iya lawas.
Gindala siya sa ospital kag ginpaidalom sa medical examination kag CT scan agud masiguro nga wala ini sang seryoso nga injury.
Gilayon man nga ginpatawag sang administrasyon ang tanan nga estudyante nga imbolbado, upod ang ila mga ginikanan, agud magdayalogo kag masolbar ang insidente.
Samtang, nagpablotter naman ang pamilya sang biktima.
Nagpabutyag naman ang pamilya sang Grade 12 nga sabton nila ang gastos sa pagpabulong sa biktima.
Sa pihak nga bahin, nagpahanumdom ang administrasyon sang Father Gratian Murray Integrated School nga ang tanan nga indi paghinangpanay ang dapat ginasulbar paagi sa pag-istoryahanay kag pagpangayo sang bulig sa mga school officials, indi pinaagi sa pagpanakit.
Ginpabutyag man sang eskwelahan nga padayon nila nga ginapalig-on ang awareness campaign batok sa school violence kag bullying agud malikawan ang pareho nga insidente sa palaabuton.
