Pilason ang 18-anyos nga babayi matapos gintiro sang iya anay nobyo sa kilid sang kalan-an sa atubang sang Bacolod City Government Center sa Barangay Villamonte, Bacolod City, kagab-i, Hunyo 27.
Ginkilala ang biktima nga si alyas “Queen” samtang ang suspect amo si “Icee” kag lunsay residente sang Kabankalan City.
Sa interview sang Bombo Radyo kay Police Lieutenant Raphael Palacios, Deputy Station Commander sang Bacolod Police Station 4, naghagaray si Queen kag ang iya abyan nga lalaki nga manyapon sa gwa bangud birthday niya.
Suno diri, ginsundan sang suspect ang iya anay nobya kag ginkomprontar ang lalaki nga upod sini.
Ginpamangkot sang suspect ang biktima kun migo sini ang iya upod.
Suno kay Palacios, pwersahan nga ginbutong ni Icee si Queen apang ini ang wala nag-upod.
Bangud sini, gintinguhaan sang suspect nga tirohon ang lalaki apang wala naglupok ang armas.
Kasunod sini, duha ka beses nga ginpalupokan sang suspect ang biktima kag na-igo sa iya nga tiyan.
Gilayon nga gindala si Queen sa ospital para sa nagakaigo nga pagbulong.
Nagpalagyo naman si Icee matapos ang krimen.
Na-recover sa crime scene ang apat ka basiyo sang bala.
Padayon ang imbestigasyon sang mga kapulisan angot sa insidente.
