Nagpatigayon sang White Ribbon rally ang masobra 3,000 ka miyembro sang nagkalain-lain nga progressive kag religious group sa EDSA People Power Monument kahapon, agud liwat nga ipanawagan ang pagpasabat sa tanan nga imbolbado sa korapsyon.
Sa pagpanguna ni Kidapawan Bishop Jose Bagaforo, ginpanindugan sang mga nagmartsa nga indi dapat maghipos ang publiko samtang ginakawat ang pondo sang pumuluyo.
Magluwas sa mga plakards, nagbaligya man ang mga pamatan-on sang mga t-shirt, kalo, kag sticker nga may panawagan nga ipresuhon ang mga korap nga opisyales.
Nagperform man ang pila ka mga independent artist sa halos lima ka oras nga programa.
Ginpahayag naman ni Bagong Alyansang Makabayan o Bayan chairman Teddy Casinio nga indi lamang pila ka mga personalidad ang dapat manabat, kundi mangin ang mga political dynasty kag ang sistema sang nagapalapnag sang korapsyon.
Nagdangat sa 2,500 ka mga pulis ang gin-deploy para sa seguridad sa protesta.
Suno sa kapulisan, nangin malinong kag matawhay ang nasambit nga pagtilipon kag wala man sang narecord nga insidente.
Nagtapos ang programa alas-5:55 ang takna sa hapon sa pagkanta sang “Bayan Ko” sang mga nagtambong.
