Nagpahayag si Ombudsman Jesus Crispin Remulla nga iya igahingyo sa Sandiganbayan nga kakason si anay Department of Public Works and Highways (DPWH) Secretary Manuel Bonoan bilang akusado agud magserbe bilang state witness sa kaso may kaangtanan sa ginaalegar P573 million kickbacks halin sa mga flood control projects.
Suno kay Remulla, may yara na sang kasugtanan para sa kooperasyon ni Bonoan bilang state witness sa ginapatigayon nga imbestigasyon kag trial sa kaso.
Nagapangatubang sang kaso nga plunder si Bonoan angot sa P573 million kickbacks.
Suno diri, ila ipangabay sa korte nga i-discharge si Bonoan bilang respondent agud makahatag ini sang testimoniya bilang state witness.
Nauna na nga gintugutan sang Sandiganbayan Fifth Division nga ibutang si Bonoan sa hospital arrest kag magpabilin sa Philippine National Police General Hospital sa Camp Crame.
Natalana naman nga ipatigayunon ang arraignment sang kaso subong nga adlaw, Martes.
Suno pa diri, importante ang mangin testimoniya ni Bonoan sa pagpalig-on sang mga kaso nga ipasaka sang Ombudsman batok sa mga imbolbado sa iregularidad sa mga flood control projects bangud sa nahibaluan sini sa bug-os nga sistema.
