Nagpanawagan ang regional director sang Department of Education-Negros Island Region sa mga ginikanan kag mga otoridad nga buligan sila sa DepEd sa pagbantay sa mga estudyante.
Sa interview kay Dr. Ramir Uytico, ang primary nga katungdanan sang mga manunudlo amo nga tudluan ang mga kabataan sa eskwelahan.
Suno kay Uytico, indi man mahimo nga maubos nalang ang oras sang isa ka manunudlo sa pagbantay sang mga estudyante kag indi na ini mahimo nga makatudlo pa.
Suno diri, sa mga nagakatabo sa karun nagakinahanglan na nga magbuligay ang mga ginikanan, mga kapulisan, iban pa nga government agencies kag eskwelahan agud nga masiguro ang seguridad sang mga estudyante.
Gin-athag sang regional director sang DepEd NIR nga ang pagpatigayon sang mga eskwelahan sang Anti bullying pledge sa kada flag ceremony ang indi reaction sa mga nagakatabo sa karun nga mga kalakalasan nga imbulbado ang mga estudyante.
Suno kay Dr. Ramir Uytico, masobra na sa isa katuig sa karun ukon humalin sang gintukod ang DepEd NIR ginapatuman na nila ini.
Suno kay Uytico, antes pa man natabo ang sa Tacloban City ginapatuman na nila ang antibullying pledge nga kabahin sang peace campaign agud nga pakigbatuan ang bullying sa mga eskwelahan.
