Transnational online group nga “764 Network,” ginatudlo nga nag-impluwensya sa duha ka suspect sa school shooting sa Tacloban City

Sa ginpatigayon nga hearing sang Senate Committee on Women, Children, Family Relations and Gender Equality kahapon, ginpahayag ni Senator Risa Hontiveros nga may mga indikasyon nga ang pagpangluthang sa San Jose National High School sa Tacloban City ang naimpluwensiyahan sang isa ka foreigner group.

Gintumod sang senador nga ang insidente ang posible may kaangtanan ukon impluwensya sang ginatawag nga “764 Network”, kag ang ini nga grupo ang yara sa Texas, USA.

Nahibaluan nga sa Estados Unidos, opisyal na nga ginhingadlan bilang “global child exploitation enterprise” ang grupo nga 764.

Base sa natukiban sang komitiba, ang modus operandi sang ini nga grupo amo ang pagtarget sa mga bulnerable nga mga kabataan sa internet.

Ginagamit nila ang mga chat functions sa mga online gaming platforms agud mangin “adult groomer”.

Gina-brainwash kag gina-radicalize nila ang mga pamatan-on agud magsunod sa mga bayolente nga buluhaton kaangay sang school shootings, maghimo sang pornograpiya, kag manakit sang iban nga tawo ukon sa ila mismo kaugalingon.

Samtang, ginpanginwala naman ni Hontiveros ang mga nagalapta nga balita nga ini ang nagapanawagan para sa total ban sang mga online games kaangay sang Roblox ukon GoreBox.