Nakilal-an na ang lalaki nga nasapwan nga wala sang kabuhi sa kilid sang dalan sa Prk Langka, Brgy Pacol, Bago City alas-10:30 kahapon sang aga.
Ang biktima ang ginkilala nga si Raymart Roxas, alyas “Mickey Mouse”, 26-anyos, kag residente ang Prk Adarna, Brgy. 16, Bacolod City.
Kahapon, nasapwan ang bangkay ni Roxas nga naputos sa habol kag ginputos ang bilog niya nga lawas sang duct tape.
Nakabaklid ang kamot ni Roxas sa likod nga ginhigot sang wire kag ginputos sang pink nga duct tape ang iya liog.
Sa interview sang Bombo Radyo kay PLt Col James Latayon Jr, hepe sang Bago City Police Station, nagatrabaho bilang barker sa Bacolod City Public Plaza si Roxas kag ulihi ini nakita sa plaza sang Hunyo 27.
Suno diri, naka-agi na preso sang duha ka beses si Roxas bangod sa illegal gambling kag ini may record man nga involved sa pagpangawat sa ciudad sang Bacolod.
Ginabanta nga isa ukon duha ka adlaw na ini nga patay apang wala pa nahibaloan kun ano ang rason sang kamatayon sini.
Pahayag ni Latayon, nakilal-an si Latayon sang iya mga utod kag iya live in partner bangod sa mga tattoo sini sa kamot.
