Patay ang duha ka mag-utod nga menor de edad matapos nga malumos sa suba sa Purok Riverside, Barangay Tabunan, Bago City, Negros Occidental, samtang may isa pa ka bata nga dutayan man malumos.
Ginkilala ang mga ini kanday Jeraldine Siwala, lima ka tuig, kag Jerome Siwala, tatlo ka tuig, mga residente sang nasambit nga lugar.
Samtang nakasalbar naman si alyas Marvin, tatlo ka tuig kag residente man sang Purok Riverside, Barangay Tabunan, Bago City, Negros Occidental.
Sa interview sang Bombo Radyo Bacolod kay Police Master Sergeant Magno Pahayupan Jr., Investigator on case sang Bago City Police Station, ginpahayag ni Sarah Alipato, residente sa lugar, nga matapos niya nabatian nga may yara sang nalumos, gilayon ini nga nagpadulong sa suba agud nga i-verify ang report.
Sang ara na ini sa suba nakita sini ang bata nga babayi nga nagakulob kag nagalutaw na sa tubig samtang ang bata nga lalaki ang nagalutaw apang nakasandig sa bato.
Gindala pa ang duha sa ospital apang gindekalarar nga dead on arrival.
Nakita man ang isa ka bata nga lalaki nga nagapangayo sang bulig kag gilayon nga ginrescue kag nasalbar sa pagkalunod.
Antes ang insidente, nahibaluan nga naglisensya ang duha nga nalumos sa ila amay nga magahampang sa gwa sang ila balay, apang sila ang ginhagad ni Marvin nga maghampang malapit sa ginapatihan madalom nga bahin sang suba.
Wala pa sa karun nahibaluan kun nakadalin-as ang mga kabataan ukon naglangoy mismo sa suba antes nalunod.
