Patay ang bata matapos nga gintiro sang kaugalingon nga amay sa Purok Sambag, Barangay Libas, Isabela, sang Huwebes, Hulyo 02.
Ginkilala ang biktima kay Losio Ramirez Jr., 33-anyos samtang ang suspetsado amo si Losio Ramirez Sr., 74-anyos, lunsay mga nagatrabaho sa kampo kag residente sang nasambit nga lugar.
Sa interview sang Bombo Radyo Bacolod kay Police Major Joseph Partidas, hepe sang Isabela Municipal Police Station, sa imbestigasyon nahibaluan nga ang imbulbado ang mag-amay kag ang bata nga nagasaulog sang iya nga kaadlawan upod ang iya abyan sa ila nga balay.
Suno kay Partidas mga alas 3:00 ang takna sang hapon, nagrekta ang amay sa balay sang iya bata matapos maglawig sang karbaw.
Suno sa hepe, samtang nagainum ang apat ang isa ka abyan sang biktima ang nagbaisay kag ang amay ang nagpatunga agud nga mauntat ang ginamo.
Apang ang amay naman ang gin-away sang iya bata.
Sang nakapauli na ang mga bisita sang biktima, nagpauili man ang amay apang makaligad lamang sang pila ka minuto ginsulong naman ini sang iya bata kag nagsinggitan sa gwa sang balay.
Nagwa ang amay kag hinali lamang nga ginluthang ang iya bata gamit ang sulpak.
Naigo si Jr. sa natuo sini nga abaga nga gintunaan sang iya kamatayon.
Suno kay Partidas, naaresto ang amay sa ila ginpatigayon nga hot pursuit operation apang nagapangayo sang tion ang live in partner sang biktima agud paminsaron kun mapasaka sang reklamo batok sa amay.
