Luyag sang defense team ni Vice President Sara Duterte paagi kay Atty. Carlo Narvasa nga i-play sang prosecution ang bilog nga duha ka oras nga video sang bise presidente kun sa diin nagpahayag ini sang assassination threat batok kanday President Ferdinand Marcos Jr, First Lady Liza Araneta-Marcos kag anay House Speaker Martin Romualdez agud nga ipakita ang full context sang iya nga statement.
Nahibaluan nga sa online briefing sang Nov. 23, 2024, ginpahayag ni Duterte nga nag-hire ini sang assassin agud nga patyon sanday President Marcos Jr, First Lady kag anay House Speaker kun siya ang mapatay.
Kahapon, sa pagbalik sang trial, ang prosecution team ang nag-umpisa sa pagtalakay sang fourth article of impeachment batok kay Duterte, paagi sa pagpresentar sang senior agent sang National Bureau of Investigation nga nag-authenticate sang video.
Ang prosecution ang nag-request para sa specific 2-minute video kun sa diin ginhinambit sang bise presidente ang alegasyon sang pagpatay apang madasig man nga nag-oppose ang defense kag nagpahayag nga ang duha ka oras nga statement sang bise presidente sa news conference ang dapat ipakita agud nga mapakita man ang context sang statement sini.
Ini ang gin-updan man ni Senator judge Alan Peter Cayetano kun sa diin nag-recess kadali ang Senate Impeachment Court agud diskusyunan ini.
Sa pagbalik, ginpasugtan ni Senate presiding officer Chiz Escudero nga i-play ang masobra 2-minutes nga video.
