Indi magnubo sa 42 ka indibidwal ang napatay kalakip ang 18 ka mga pulis kag 11 ka suldado matapos ang serye sang separado nga pagpang-atake sang mga armado nga rebelde sa probinsya sang Balochistan, sa Pakistan.
Santo sa report, apat ka mga sibilyan ang nalakip man sa mga napatay, samtang sa bahin naman sang mga rebelde, kapin 54 ang mga ginbawian sang kabuhi sa ginpatigayon nga operasyon sang mga otoridad.
Suno kay Lieutenant General Ahmad Sharif Chaudhry, spokesperson sang militar sang Pakistan, nag-umpisa ang mga pag-atake sang Lunes kag nagpadayon tubtob sang Miyerkules.
Nagluntad ang una nga insidente sa Ziarat district sang Balochistan kun sa diin ginsalakay sang mga rebelde ang isa ka estasyon nga nagabantay sang Mangi Dam Project.
Gindakop kag ginpatay ang 18 ka mga pulis samtang sang Miyerkules naman, gin-ambush sang mga rebelde ang isa ka military vehicle nga nagresulta sa kamatayon sang 11 ka mga suldado.
Ginaangot ang grupo nga Balochistan Liberation Army (BLA) kag ang Tehrik-e Taliban Pakistan (TTP).
Nahibaluan nga target sang ini nga mga grupo amo ang security forces, mga foreign investment projects, kag mga imprastraktura sa rehiyon.
Sa karon, padayon nga gina-track sang gobyerno ang mga makawala nga grupo kasubong man ang mga nagasuporta sa ila, kag ang mga nagahatag sang tiniran ukon base para sa ila operasyon.
