Patay ang 48 anyos nga lalaki matapos ginbuno sa Prk Acacia 2, Brgy 27, Bacolod City sang Miyerkules alas-9:40 sang gab-i.
Ang biktima ang ginkilala nga si Joefel Ramos, 48 anyos, kasado, residente sang Sitio Bongyod, Brgy 2, Himamaylan City; samtang ang suspect ang ginkilala naman nga si Rogan Palermo, single, kag residente sang Brgy Basak, Cauayan, Negros Occidental.
Sa inisyal nga imbestigasyon sang Bacolod Police Station 4, si Ramos ang makapila ka beses nga ginbuno ni Palermo gamit ang wala matumod nga patalom.
Gilayon man nga nagpalagyo ang suspect matapos ang krimen.
Ang biktima ang gindala pa sa Corazon Locsin Montelibano Memorial Regional Hospital apang ini ang gindeklarar nga dead on arrival.
Sa karun, padayun ang hot pursuit operation sang kapulisan batok sa suspect, samtang ginatumod man ang motibo sa likod sang krimen.
