Nag-abanse na ang France sa semifinals sang FIFA World Cup matapos ginlutos ang Morocco, sa score nga 2-0, sa quarterfinal match.
Ginpangunahan nanday Kylian Mbappe kag Ousmane Dembele ang kadalag-an sang France.
Ginbuksan ni Mbappe ang scoring sa ika-60 minutos kag nakapasulod sang ikawalo na nga goal sa torneo.
Makaligad lamang ang anum ka minutos, gindoble ni Dembele ang advantage sang France.
Apisar ginlauman nga mangin mabug-at nga kontra ang African champions nga Morocco, nagapabilin nga kontrolado sang France ang kabug-usan nga hampang.
Sa pihak sang hugot nga depensa sang Morocco sa first half, nagpangibabaw gihapon ang opensiba sang France sa second half.
Natalana nga atubangon sang France ang Spain sa semifinals nga pagahiwatun sa Arlington, Texas sa Miyerkules alas-3:00 sa kaagahon (oras sa Pilipinas).
Samtang sulod naman sa semi-finals ang Spain matapos ini magdaug batok sa Belgium sa final score nga 2-1.
Una nga nakapuntos ang Spain sa ika-30 minutos sang hampang paagi kay Fabian Ruiz, nga naghatag sang timprano pa nga advantage sa ila nga team.
Apang, nakabawi pa ang Belgium sa ika-40 minutos sang makapuntos si Charles De Ketelaere agud mabalanse ang score sa 1-1 sa first half.
Sa second half, ginpakita sang Spain ang ila dominasyon sa opensiba kag kontrol sa hampang.
Sa ika-88 minutos, ginpasulod ni Mikel Merino ang game-winning goal para sa La Roja.
Ginapaabot ang natalana nga hampang sa tunga sang Spain kag France nga lunsay mga European football giants para sa kahigayunan nga makasulod sa World Cup final.
