Nagdangat sa P950, 000 ang balor sang halit sa nagluntad nga sunog sa storage facility kag clinic sang Antonio L. Jayme Elementary School sa Alijis-Murcia Rd., Brgy. Mansilingan, Bacolod City alas-8:53 sang aga, Hulyo 12.
Sa inisyal nga impormasyon, natuloan sang tubig ulan gikan sa buslot nga atop ang electrical outlet nga ginalantaw gintunaan sang kalayo.
Nahalitan sang sunog ang pila ka mga libro kag iban pa nga butang sang clinic.
Wala naman sang may nasamaran sa nasambit nag insidente.
Samtang, nagdangat naman sa P2,250,000 ang balor sang halit sa nagluntad nga sunog sa isa ka balay sa Purok 8, Brgy. Tangub, Bacolod City alas-10:30 sang gab-i, Hulyo 10.
Ang balay ang gina-istaran sang lima ka indibidwal nga ginapanag-iyahan ni Philip Talorete.
Wala naman sang may nasamaran sa nasambit nga insidente.
Padayon pa ang imbestigasyon sang mga otoridad sa pagtumod sang gintunaan sang kalayo.
