Ginpakigbato ni Senator-Judge Alan Peter Cayetano si Davao City Mayor Sebastian “Baste” Duterte batok sa mga alegasyon nga mahimo may kaangtanan ini sa ginatawag nga “Operation Romanov.”
Ini ang ginhimo ni Cayetano matapos nga maghatag sang bag-o nga pahayag si NBI Regional Director Atty. Jeremy Lotoc sa ikalima nga adlaw sang impeachment trial ni Vice President Sara Duterte.
Sa pagpamangkot nanday Senator-Judges Raffy Tulfo kag Panfilo “Ping” Lacson, ginpahayag ni Lotoc nga ang gina-alegar target sang pagpamahog indi si Vice President Sara kundi si President Ferdinand Marcos Jr. kag ang iya nga pamilya.
Suno kay Lotoc, nakita sang mga imbestigador sang NBI ang isa ka statement ni Davao City Mayor Baste Duterte sa isa ka rally sang Enero kun sa diin ginhinambit sini ang nadangtan sang Romanov family sang Russia bilang paandam kay President Marcos.
Ang Romanov family ang ulihi nga dinastiya sang mga tsar sa Russia nga ginpatay sadtong 1917 matapos ang Bolshevik revolution.
Apang suno kay Cayetano nga indi dapat pag-ikonsiderar bilang pamahog ang pahayag ni Mayor Duterte.
Suno sa Senador may yara sang kinalain ang isa ka paandam kag pamahog.
Gin-emphasize ni Cayetano nga importante nga mangin mahinalungon ang impeachment court sa paghatag sang konklusyon, ilabi na nga indi pa maathag kung ang paghinambit sang “Romanov” ang may direkta nga kaangtanan sa isa ka plano ukon isa lamang ka simbolismo.
Suno pa kay Cayetano, dapat mangin patas ang korte indi lamang sa First Family kundi kalakip man kay Mayor Baste Duterte kag sa pamilya Duterte samtang nagapadayon ang trial.
