Nagaayo ang station commander sang Bacolod City Police Station 8 sa publiko nga indi paggamiton ang emergency hotline nga 911 para lamang sa lango-lango.
Ini matapos nga negatibo ang gin-report nga gina-alegar bomb threat sa Mariano G. Medalla Integrated School, Brgy. Pahanocoy, Bacolod City kahapon, July 21.
Nahibaluan kahapon, alas 12:30 ang takna sang udto, nabaton sang mga kapulisan ang nasambit nga report sang gina-alegar nga bomb threat.
Gilayon man ini nga ginrespondehan sang mga otoridad.
Gin-abisuhan man ang school officials nga magpatuman sang safety measures samtang naga-establisyar ang police personnel sang seguridad sa school premises.
Nagkoordinar man gilayon sa Explosive Ordnance Disposal and Canine (EOD/K9) Unit para sa pagpatigayon sang bomb threat assessment kag clearing operations.
Natapos ang clearing operations alas 2:25 sang hapon kag nagresulta sa negatibo nga presensya sang explosives.
Bangud sang gina-alegar bomb threat, gin-suspend man ang klase.
Sa karun nagapadayon pa ang imbestigasyon agud nga matumod ang ginhalinan sang gina-alegar nga bomb threat.
Sa interview sang Bombo Radyo Bacolod kay Police Major Rondyl Tapang, Officer-in-Charge sang Bacolod City Police Station 8, gintawgan nila ang numero sang nagreport apang indi na macontact.
Suno sa station commander ang programa nga call 911 ang para sa emergency calls kag indi dapat paggamiton sa mga lango-lango ukon hoax.
Nagpatigayon man ang mga otoridad sang symposium kag gindiscuss ang himuon sa tion sang mga emergencies kaangay sang linog kag gin-sal-ot ang active shooter agud indi magulpihan ang mga estudyante.
Sa karun nga clear na ang eskwelahan mahimo na magbalik ang face to face classes.
