Alas-11:00 kagab-i, nadevelop na bilang Bagyo ang ginamonitor nga Low Pressure Area sa sulod sang Philippine Area of Responsibility.
Alas-3:00 kaina sang kaagahon, ang sentro sang Tropical Depression “KIYAPO” ang yara sa 960 km nasidlangan sang Central Luzon nga may kabaskugon sang hangin nga 45 km/h kag pagmadlos nga 55 km/h.
Ini ang nagahulag sa 20 km/h West Northwestward nga direksyon.
Alas-5:00 subong nga aga, ginpaidalom na sa Tropical Cyclone Wind Signal No 1 ang Batanes, Cagayan kalakip ang Babuyan Islands, Isabela, Apayao, Abra, Kalinga, eastern kag central portions sang Mountain Province, eastern kag central portions sang Ifugao, Ilocos Norte, northern portion sang Ilocos Sur, kag northern portion sang Aurora.
Ginalauman nga mapabilin sa west northwestward nga dereksyon ang hulag sang bagyo tubtob sa Sabado padulong sa Luzon Strait antes ini magliko sa northwestward nga dereksyon.
Ini ang mahimo maglabay sang tuman ka lapit sa northeastern portion sang mainland Cagayan bwas sa aga ukon sa hapon, kag mahimo man nga maglandfall sa vicinity sang Babuyan Islands bwas sa hapon tubtob sa gab-i.
Samtang ang Bagyo ang ginalantaw nga maggwa sa PAR sa Sabado sang aga ukon sa hapon.
Samtang padayon nga nagaapekto ang Southwest Monsoon ukon hangin habagat sa Mindanao kag western sections sang Southern Luzon kag Visayas.
Lauman ang lapta-lapta nga pag-ulan sa Mindanao, Western Visayas, Negros Island Region, Central Visayas, Occidental Mindoro, kag Palawan dala sang habagat
Samtang, maeksperyensyahan man ang lapta-lapta nga pag-ulan sa Bicol Region, Eastern Visayas, kag Romblon tuga naman sang trough sang Tropical Cyclone Kiyapo.
Lauman naman ang tumalagsahon nga pag-ulan sa Metro Manila kag sa nabilin nga bahin sang Luzon dala sang localized thunderstorms.
Ginapaandaman ang publiko sa posible nga pagbaha ukon landslide sa mga apektado sang madamol nga pag-ulan.
