Ginbawian sang kabuhi ang 18-anyos nga aktres nga si Kaylee Hottle, nga bida sa duha ka pelikula sang Godzilla, sa isa ka car accident sa Maryland, U.S., Martes sang kaagahon, suno sa Frederick County Sheriff’s Office.
Suno diri, sakay si Hottle kag isa pa ka pasahero sa 1995 Honda Accord nga ginamaneho sang isa ka 19-anyos nga lalaki sang madulaan ini sang kontrol, nagliko sa two-lane nga dalan kag nabunggo sa kanal.
Ginapatihan madasig ang pagpadalagan ang rason sang aksidente suno sa mga otoridad.
Gindala si Hottle sa ospital apang wala na ini natabangan pa.
Suno sa kapulisan, nakaangkon sang mga pilas ang driver samtang ang isa pa ka pasahero ang nagbalibad nga magpabulong.
Sang 2024, ginpasidunggan si Hottle sa kategorya nga Best Performance by a Younger Actor para sa Saturn Award.
Ang iya amay nga si Joshua Hottle ang una nga nagpakigbahin sang masubo nga balita natuhoy sa pagtaliwan sang iya bata paagi sa isa ka emosyonal nga video sa social media gamit ang American Sign Language (ASL).
