Ginpakilala sa Japan ang isa ka bag-o nga personal cooling cabinet nga ginatawag “Do Hiemon Box”, ukon mas kilala bilang “human refrigerator,” bilang sabat sa tag-init sa pungsod.
Ang Do Hiemon Box amo isa ka gamay nga cooling chamber kun sa diin mahimo magsulod kag makapungko ang isa ka tawo agud magpabugnaw sa sulod.
Suno sa kompaniya, supisyente na ang 10 minutos nga pagtinir sa sulod agud mapapanaug ang temperatura sa lawas kag mabuhinan ang sintomas sang heat exhaustion.
Nagapabilin nga 15 degree Celsius ang temperatura sa sulod sang cooling cabinet, may tatlo ka cooling modes, kag otomatiko nga gakapatay sa sulod sang 20 minutos agud malikawan ang tuman katugnaw nga temperatura.
Ginapatihan mas tipid man ini sa kuryente sangsa ordinaryo nga portable air conditioner.
Ginabaligya subong ang Do Hiemon box sa balor nga 1.5 million yen ukon kapin P600,000 kada isa.
