Nagpanawagan ang Negros Occidental Police Provincial Office (NOCPPO) sa publiko nga indi gid pagtandugon ukon paghakwaton ang bisan ano nga ginapatihan bomba ukon explosives nga makita sa komunidad.
Sa interview sang Bombo Radyo Bacolod kay Police Captain Judesses Catalogo, Public Information Officer sang NOCPPO, kinahanglan gilayon nga i-report sa pinakamalapit nga police station panaglitan may makita nga bomba.
Pahanumdom ni Catalogo, nga magpalagyo gilayon sa lugar kag sigurohon nga ang iban nga tawo, ilabi na ang mga kabataan, ang indi makapalapit sa nasambit nga explosive bangud sa posibilidad nga magalupok ini apisar sang kadugayon.
Dugang pa, ang Explosive Ordnance Disposal (EOD) unit lamang ang may otoridad kag nagakaigo nga kagamitan agud luwas nga makuha kag madisarmahan ang bomba.
Ang ini nga pahanumdom ang kasunod sang natukiban nga bomba sa Brgy. Matab-ang, ciudad sang Talisay sa diin aksidente nga nakutkutan sang isa ka backhoe ang isa ka bomba nga yara sa kilid sang suba.
