Ginpahayag sang Executive Vice President sang BAYAN MUNA nga dapat ilakip man sa SONA ni President Ferdinand Marcos Jr. ang panawagan nga dapat mahuya man ang iya kaupdanan sa Malacanang bangud sa mga nagakatabo subong sa pungsod.
Madumduman nga ang linya nga “Mahiya naman kayo!” ang nakakuha sang madamo nga palakpak gikan sa mga miyembro sang Kongreso, government officials, kag iban pa sang nakaligad nga ikaapat nga SONA ni Marcos sang 2025.
Sa interview sang Bombo Radyo Bacolod kay Atty Carlos Isagani Zarate, ginpahayag sini nga dapat indi maghugas kamot si Marcos bangud imposible nga wala ini sang ihibalo angot sa anomalya sa flood control project.
Suno kay Zarate, dapat man sukton si Marcos bangud indi madula ang partisipasyon sini ilabi na nga ang tanan nga budget ang nagaagi sa iya kag siya man ang nagapirma.
Para sa iya, ang matuod nga SONA ang makita sa gwa kag mga dalanon kun sa diin madamo sang mga nagaprotesta.
Ini bangud sa tuman nga kapigaduhon nga tubtob sa subong wala sa gihapon nasolusyonan sang administrasyon ni Marcos.
Paathag sini nga wala na sila sang may ginalauman pa sa subong nga SONA bangud wala man sa gihapon ginahatagan sang pagtamod sang gobyerno ang krisis nga ginaatubang sang mga pumuluyo lakip na diri ang panawagan sang mga transport sector nga kakson ang Value Added tax (VAT) kag excise tax sa mga produktong petrolyo.
Sa baylo, suno kay Zarate, mas ginsunod pa sang presidente ang mga dako nga negosyante sang langis.
Suno diri, nakita niya kun ano kahuyang ang administrasyon subong.
Pahayag sini, kada SONA puro lang pasalig ang ginahimo sang Presidente kag wala man sang may natuman.
