Maga-upod ang grupo sang transport group nga Pagkakaisa ng mga Samahan ng Tsuper at Opereytor Nationwide (PISTON) sa patigayunon nga kilos-protesta kadungan sa State of Nation Address (SONA) ni President Ferdinand Marcos Jr. subong nga hapon.
Sa interview sang Bombo Radyo kay Modesto Floranda, National Presidente sang PISTON, ginakondena sini ang kapabayaan sang administrasyon ni Marcos.
Ini bangud wala sa gihapon nasolusyonan ang padayon nga pagsaka sang presyo sang produktong petrolyo.
Suno kay Floranda, apisar nga may ginahatag nga fuel subsidy, kaangay nga wala ini sang pulos bangud indi sa gihapon maresolba ang problema bangud padayon sa gihapon ang pagsaka sang presyo sang langis.
Suno diri, kun seryoso ang gobyerno sa pabulig sa mga pumuluyo, dapat kakson ang Value Added Tax (VAT) kag excise tax sa produktong petrolyo.
Pahayag sini nga dapat ang gobyerno ang magbakal sang krudo sa luwas sang pungsod agud may stock kag ini ang pagagamiton sa tion kun magsaka ang presyo sang produktong petrolyo agud indi maapektuhan ang mga pumuluyo.
Gani nagapangagda ini nga mag-upod sa ila sa patigayunon nga kilos-protesta sa SONA sang presidente sa Batasang Pambansa Complex sa Quezon City.
