Nagtuga sang kaugalingon nga kilat ang nagaduging nga wildfire sa France sa diin nadugangan ang mga nasunog nga bahin sa lugar bangud sa pagpangilat.
Suno sa mga opisyal sang France, bangud sa makusog nga kalayo, nagtuga sang isa ka pyrocumulonimbus o pyroCb, isa ka sahi sang thunderstorm nga halin sa tuman ka init nga temperatura halin sa widlfire.
Magluwas sa mga kilat, nagadala man ang thunderstorm sang mabaskog kag pabag-o bag-o nga pagmadlos sang hangin nga mas nagpadasig sa paglapta sang kalayo.
Suno sa National Federation of Firefighters sang France, subong lamang sila naka-record sang amo nga kalamidad sa ila pungsod.
Sa kasagaran, ini ang mas nagakatabo sa North America kag Australia.
Nag-umpisa ang wildfire sadtong Hulyo 22 sa banwa sang Saumos.
Humalin sadto, ginabanta masobra 420 km na sang kagulangan kag hilamunan ang natupok sang kalayo, samtang kapin 240 naman ka mga pamalay ang nagkalaguba.
Sa padayon nga paglapta sang kalayo, masobra na sa 300,000 ka mga residente sa Gironde ang ginbakwit bilang paghalong.
