Kabit-kabit nga 75 ang grado nga ginhatag ni Frank Carbon, Chief Executive Officer sang Metro Bacolod Chamber of Commerce and Industry (MBCCI) sa State of the Nation Address (SONA) ni President Ferdinand “Bongbong” Marcos Jr.
Sa interview sang Bombo Radyo Bacolod kay Carbon, sa perspective sang business sector, kun may-ara sang pag-uswag sa negosyo, maga-uswag man ang pungsod.
Gani isa sa ginalauman niya nga mabatian sa SONA amo ang status sang Foreign Direct Investment (FDI).
Pahayag sini nga ang foreign investments ang masami nagapasulod sang billion peses nga capitalization, nga makagenerate sang madamo nga trabaho.
Dugang pa sini nga ang mga foreign investors ang nagapasulod man sang mga modern technologies sa Pilipinas.
Suno kay Carbon, luyag sang mga negosyante nga mabatian gikan sa Presidente kun ano ka damo ang nagasulod nga foreign investment, kun ini ang nagsaka ukon nagpanaog, ano kadamo sang nahimo nga trabaho kag kun ano nga sahi sang trabaho ang nagenerate.
Pahanumdom sini nga madamo sang mga foreign investors nga nagduha-duha na sa pag-invest sa Pilipinas sumugod sang naglupok ang issue sa kurapsyon.
Luyag sang business sector nga mabatian kun ano ang ginahimo nga tikang sang gobyerno agud mabalik ang pagsalig sang mga foreign investors.
Sa iya ulihi nga nahibaluan, ang FDI sang Enero tubtob Abril ang 60 porsyento nga nagnubo, kun ikumparar sa kaangay nga binulan sang nakaligad nga tuig.
