Ginhingyo sang House prosecution panel sa Senate impeachment court nga tugutan ang alternating presentation of evidence sang prosecution kag defense kada Article of Impeachment batok kay Vice President Sara Duterte.
Suno sa panel, sa baylo nga tapuson anay sang prosecution ang paghatag sang tanan nila nga ebidensya antes makasabat ang depensa, mas maayo kun mahatagan gilayon sang kahigayunan ang depensa nga makapamatok ukon magdepensa tuhoy sa alegasyon kag indi na maghulat tubtob matapos ang bug-os nga presentasyon sang kaso, antes pa man magpadayon sa madason nga artikulo.
Nagapati ang panel nga mas mangin organisado ang nasambit nga sistema.
Apang, ginpahayag sang panel nga yara gihapon sa Senate impeachment court ang pinal nga desisyon sa mangin lakat sang trial.
Magapadayon ang impeachment trial ni Duterte subong nga adlaw, Miyerkules, Hulyo 29.
