Indi magnubo sa pito ka mga minero ang ginbawian sang kabuhi matapos maglupok ang isa ka minahan sa Baluchistan, Pakistan kahapon sang Huwebes, Hulyo 30.
Nagdangat naman sa 41 ka iban pa ang na-trap sa idalom sa duta samtang nagapadayon ang rescue operation.
Suno sa mga otoridad, natabo ang paglupok sa gwa sang Quetta, capital sang probinsya sang Baluchistan, kag ginapatihan nga tuga sang natipon nga methane gas ang rason sang paglupok sa sulod sang minahan.
Narekober na ang mga bangkay sang pito ka minero pila ka oras matapos ang insidente, samtang padayon ang pagpangita sa mga nabilin nga na-trap sa sulod.
Suno sa mine inspector nga si Ghani Baloch, mabudlay ang operasyon bangud mahimo magpanaug sang husto ang oxygen matapos ang paglupok sang methane gas, gani doble ang paghalong sang mga rescuers sa pagpatigayon sang operasyon.
Masami nagakatabo ang kaangay nga insidente sa industriya sang pagmina sang karbon sa Baluchistan bangud sa kakulang sang supisyente nga bentilasyon, gas monitoring system, kag iban pa nga safety measures.
Madugay na nga nagapanawagan ang mga mamumugon kag labor groups sa mas hugot nga pagpatuman sang safety regulations agud maproteksyunan ang mga minero.
